juni 1, 2018
fan ûnbekend*
Wurdt in jonkje grutbrocht
sûnder dat er dêrfan leart,
dan giet it letter grif ferkeard,
mar dêr is net oer neitocht.
’t Jonkje waard gau grutter
mei in sterke lea en geast
en wie yn alles ’t leafste earst,
fan reedner oant tûk skutter.
Sprekken koe hy leare
fan syn master Sokrates,
mar gjin fertuten hie dy les
doe’t hy ek learde bearen.
Tsjin syn frou mar raze,
skuorre oan har skoander hier,
de sturt derôf fan ’t earme dier,
de wreedste fan de bazen.
Ut Atene farre,
want der drige in proses,
fergetten wie doe Sokrates,
mar Sparta hat him sparre.
Faak noch hat er fochten,
mar net foar deselde stêd,
yntriges makken striders sêd,
in moard hat him berjochte.
* Buste fan Alkibiades
mei 25, 2018
fan Frederic Leighton*
Admetos en Alkestis,
nei de dea wer man en frou,
sy naam it plak yn fan har man,
dy’t stjerre moast, hy kaam yn ’t nau.
Admetos,
foarst fan Pheres’ keninkryk,
Apollo hoede trou syn fee,
in god en freon foar him allyk.
Apollo
soarge foar Alkestis’ hân,
sadat sy waard Admetos’ frou,
de brulloftsfreugde hold gjin stân.
Artemis
moast it sûnder offer dwaan,
fergetten troch de brêgeman,
as straf soe sy him slangen jaan.
Slangen
as it teken fan syn dea,
behalve as in oar foar him
joech oan it deaderyk de lea.
Alkestis
wie oant yn de dea him trou,
mar koe nei ’t libbensryk werom,
sa waard sy wer Admetos’ frou.
* Frederic Leighton (1830-1896)
Skilderij ‘Hercules wrakselet mei de dea
om it lichem fan Alkestis’