november 30, 2018
fan ûnbekend*
Is der ea safolle moarde
as troch Thyestes én Atreus,
twa bruorren, moardners fan de tredde broer?
Om’t sy fersteurden sa de oarder,
hat de heit har lûd ferflokt.
Beide bruorren hawwe fochten
mei fjouwer eagen op ’e troan
fan de Mykeners, mar it hold net oer,
Thyestes kriich de earste rjochten,
hat Atreus syn goudflues socht.
Dêrtroch kriich hy noch mear rjochten,
mar Hermes hold it mei Atreus
en liet de sinne eastlik ûndergean;
Thyestes kaam ferkeard terjochte,
hat fergees syn soannen socht.
Want syn soannen waarden deade,
ta iten sieden foar de heit
en oanbean troch syn broer Atreus as lean
foar ’t stellen goudflues, dat hy skearde
fan it skiep, wat goaden skokte.
* Yllustraasje ‘Atreus op ’e troan’
november 23, 2018
fan Jacques-Louis David*
Ut Zeus syn holle waard sy berne,
faam Athena, al folgroeid,
har twadde namme, Pallas,
kriich sy troch it swaaien fan de lâns…
sa soe men har as kriichsgoadinne kenne.
Ferstannich wie sy as goadinne
mei strategysk ynsjoch toaid,
hiel oars as striidgod Ares,
swaaiend kriich en frede út balâns,
Athena soe it foar de Griken winne.
Sy kriich lykwols in byld yn Troje,
har Palladion mei helm
en skyld, in lâns foar ’t stekken,
byld troch Odysseus, de Gryk, ûntfierd,
mei Diomedes koe hy ’t wis wol roaie.
De stêd Athene woe sy winne
op Poseidon mei in beam,
dy god skonk wylde hynders
by in boarne mei in brûzend liet,
dochs waard Athene wijd oan de goadinne.
* Jacques-Louis David (1748-1825)
Skilderij ‘Athena en Ares’