januari 14, 2022
fan ûnbekend*
Mem Livia har aspiraasje
wie foar har soan Tiberius
de troan en Iulia as frou,
in wiif fan ’t losse libben,
mem wie tûk, sa barde ’t dus.
As generaal wie hy suksesfol,
tûk as bestjoerder fan it ryk
en oan syn eigen wetten trou;
wa’t neffens him ek stribbe
nei de macht, biet yn it slyk.
Yn Rome woed er net regearje,
op ôfstân koed er dat wol dwaan
op Kapri, dêr’t er stiek syn klau
út nei senaat en sibben
om fijanlik ta te slaan.
Sa waard er fijân fan syn Rome,
as gek beskôge yn syn baan
as keizer… keizer yn it nau.
* Byld ‘Tiberius’
januari 7, 2022
fan ûnbekend*
Theseus,
gjin keardel hat safolle,
lykwols net genôch belibbe,
wist net dat syn ierdske heit
de kening fan Athene wie…
der waard ek sein, oan god Poseidon
fielde hy him sterk besibbe.
Theseus
kriich ier al yn de holle|
foar gjinien benaud te wêzen,
foar held Herakles ek net;
as jonkje makke hy him ree
om ’t liuwefel fûl oan te fallen,
fielde oan ’t fijanlik wêzen.
Theseus,
de fjochter tsjin de bolle
dy’t it gea ferrinnewearre
om ’t ferneamde Maraton,
dêr’t earder ek al fochten wie;
hy wûn it fan de goare bolle,
dat syn krêft waard heech wurdearre.
Theseus,
wa soe safolle wolle?
Sels de striid tsjin Minotauros,
minske mei in bollekop,
waard wûn yn Kreta’s labyrint;
Athena’s bern hat hy sa rêden…
Minotauros deade gauris.
Theseus,
de rêder fan Athene,
koe syn libben sels net rêde,
fan in rots kaam hy yn see,
as keardel wie hy dêrta ree.
Yllustraasje ‘Theseus en Minotauros’