januari 29, 2021
fan Pierre-Narcisse Guérin*
Hippolytos, tûke jager,
skeat it iene nei it oare dier,
gie net op jacht nei froulju,
liet har gean, ferloek gjin spier.
Styfmem Phaidra waard fereale,
gie op jacht nei him, mar trof it net,
hy bleau de tûke jager,
hie fan froulju gjin ferlet.
Phaidra skeat him mei de leagen
dat er har as styfmem sketten hie,
sy hat harsels ek rekke,
’t like dat hy skuldich wie.
Hippolytos waard ferballe,
wylst Poseidon makke jacht op him,
foar him wie gjin ûntkommen,
dieren fûnen dat net slim.
* Pierre-Narcisse Guérin (1774-1833)
Skilderij ‘Phaidra en Hippolytos’
januari 22, 2021
fan Peter Paul Rubens*
As soan fan Helios, de sinne,
stie hy yn fjoer en flam foar mar
ien winsk, de sinnewein bestjoere;
heit joech ta, it moast dan mar:
‘Moatst tinke om de krekte hichte,
stjoer net te leech en net te heech,
moatst achtslaan op ’e goede oere,
’t is wol sinnich wurk, dus dreech.’
Phaëton koe net langer wachtsje,
de hynders fjouweren deroer
en sloegen letter op ’e kletter,
dat de soan ferlear it stjoer.
’t Gie fan de hichte nei de lichte,
op ierde waard it kâld en waarm,
fan meters iis nei siedend wetter,
dêrom sloech god Zeus alaarm.
Zeus slingere syn felle bliksem
troch ’t swurk, sadat de sinnewein
kaam del, de soan syn lêste oere
rûn yn ’t wetter nei de ein.
* Peter Paul Rubens (1577-1640)
Skilderij ‘De fal fan Phaëton’