april 5, 2021
Gjin maitiid sûnder ’t hagelwyt
fan blommen oan de tûken
op in hjitte dei útbrutsen,
foar it winterfolk noch ûnferwachts,
mar ’t koe dy omslach brûke.
It kaam nei bûten yn it wyt
fan t-shirt, sels dêr sûnder,
’t folk hie mei de winter brutsen,
gie de maitiid yn as hie it macht
oer ’t waar, it is gjin wûnder…
… foar ’t minskdom dat de tiid ferstiet
fan alles wat keunstmjittich
op te wekken is, de hjitte
likegoed as letter it klimaat,
want alles kin men mjitte.
Sjedêr, de loft wurdt hagelwyt
fan snie, dy’t út it noarden
wisket, inkeld te foarsizzen
is en fierder giet nei ’t eigen aard,
oan ’t folk kin it net lizze.
maart 29, 2021
De nacht friet op in oere
en spuide dy út nei de dei
om justjes langer te genietsjen
fan it ljocht as yn de jûn
de dowen ‘lekker sliepe’ koere.
Mar moarns by it lemieren,
wannear’t de sliep min ôfskie nimt
mei mannich lûs noch yn de eagen,
is der langstme nei de jûn
om mei de dowen feest te fieren.
Men sjocht it ljocht net brekken
troch de walen fan de iere moarn
om fan it skouspul te genietsjen,
troch de simmertiid ek jûn
om heech de loftrompet te stekken.
