maart 15, 2021
Se leine yn de rein op strjitte,
Habtamu de Hoop
en Christa Oosterbaan,
dochs litte sy de kiezer witte:
der is hoop.
Se geane foar emansipaasje,
froulju likegoed
as manlju, beide stean
garant foar heitelân en naasje,
’t liket goed.
Wa hat it oer diskriminaasje?
Beide, swart en wyt
berikke ’t hiele folk,
gjin bystânsmem is út ’e graasje,
sa’t faak bart.
Fuort mei de liberale goarre,
ego’s sûnder ein
dy’t foar harsels opslaan,
lit dat prinsipe mar fuortfarre
yn de rein.
maart 8, 2021
Foar fol en noch yn folle gloarje
foer de griene Pan op mar en poel,
de hoop oan board, dus moarn noch better,
it kampioenskip as it heechste doel,
’t gie fan fiktoarje nei fiktoarje.
Fan heit op soan, it koe net better,
want tradysje spriek noch altyd mei,
hoewol’t it gie om de fiktoarje,
it ideaal dat op ’e rûte lei…
wat earder wie, gie net nei letter.
As ’t net mear giet, dan mar op stiennen,
dêr’t de griene Pan sylt mei in mêst
dy’t trochrint nei de pleister-winkel,
al lûkend, dat it Snitser skip rint bêst
en sil de winterpriis wol winne.
