oktober 11, 2021
Kin in mem har bern ferjitte
as sy nei de nacht op stap
gean nei de iepen greide
om de honger te ferslaan?
Sy sil dy twa in teken jaan.
Sil in mem dy fint net merke
mei syn tastel foar it each?
Sy hat gjin weet fan bylden
om dêrmei in slach te slaan,
sy sil dy twa in teken jaan.
Sille bern de mem net folgje
wannear sy it reid yn sjit
nei ’t sjitten fan de bylden…
ûnbewust joech sy dy kâns,
tafallich kaam dy fint doe lâns.
oktober 4, 2021
Hoe sil it komme
as in skûtsje heger sylt
as op fertroude weagen?
It risiko is nommen.
It moast wol barre
dat dit skûtsje weijûn waard
en yn fertroude hannen
kaam sûnder wer te farren.
It kaam troch wille
fan it Earnewâldster folk
mei hûndert gouden hannen,
sy koene ’t skûtsje tille.
It wurdt bewarre
by ’t museum foar it folk
dat mei ferhearde eagen
sjocht hoe’t de skippers garren…
… om mei te silen
yn de striid om it bestean
mei ’t risiko foar eagen
de delgong mei te fielen.
It is goed kommen,
want de ‘Risico’ leit fêst
te blinken yn de sinne…
stek op de skipperstomme!