Archive for the Lyrysk Deiboek category

It barde yn Reahûs,
it doarp dêr’t read de kleur
wie fan de fjirtjin staasjes
rinnend bluodrich fier fan hûs
en tichterby de graasje
fan ús Sinteklaas dy’t fleur
oan ’t jonge libben joech,
mar boppe-al de flecht
fan ’t flinterke dat droech
op reade wjukken blauwe
wurden fan de berch echt
wier fierder as Blauhûs.

It hold wol fjirtjin kear de wjukken yn,
fernaam de bloeddrip, roek de soere wyn.

It saaide del op ’t famkes tichte each
en fielde ’t drippen foar’t it fierder fleach.

It wjukke by acht kleurefinsters lâns
en ’t lok joech oan har tinten noch mear glâns.

It heinde hege wurden fan it koar
en droech dy dûnsjend nei de tsjerkedoar.

Doe fleach it dêrmei hiel de ierde rûn
en dripte read oant yn de lette jûn.

Foto glês-yn-lead finster fan Karel Andringa, Reahûs

It feest brekt yn de jûntiid los
fanwege ûnbeheinde romte
yn ’t gigantysk folle telgebou
fan rjochte streken, hjoed de kromte
lykwols fan it tintdoek, as
it moat wol tûzen yn de kou.

It sfearbestean fan yn de roef
fan berte oant op slach fan stjerren
mei dêrfoar de romte fan it rom,
de fracht fan man en frou tegearre,
brocht de ivichheid foar proef,
it stal stie nei de nacht wer krom.