Archive for the Lyrysk Deiboek category

Ien stelling wie der mar:
gjin preek op dizze snein
yn ’t flakke Goaiïngea,
nim leaver Gau foar kar
en rin it hiele ein,
dyn siele lijt gjin skea.

Herfoarming kaam diskear
fan Luthers Goai yn ’t gea
mei felle preekstoelstoarm
dy’t raasde oer de lear
fan sit mei stive lea,
dyn siele wurdt hjir waarm.

De spiker op ‘e kop,
it rint op bûten út
mei noch in lêste klap:
begjin en set him op,
de himel ta beslút
beriksto stap foar stap.

Ik fyn op ’t lid in skyfke
fan sulver mei in doel,
mar hoe wit ik it liet
fan leafde fan dat wyfke,
wannear’t der net in laptop stiet?

Dan rin ik flugger fierder
op gers dat hurd en koel
ferwiist my nei papier
oer ealfrou en har ridder,
fereale, mar it kealle swier.

Hoe soe ik dan net fleane,
werom foar myn gefoel
nei brulloftsbermen dêr’t
no trekkerspoaren steane
en as se meane, bin ‘k te let.