april 25, 2022
Oranje boppe… sa jout oan it seal,
stap op en fyts mei gong dêrhinne:
‘Come and join the family’,
diel mei yn ’t grutte kapitaal,
it Valk hotel lit fytsers winne.
Ferwiist oranje streekrjocht nei de seal
om te betsjinjen wa’t dêr binne?
‘Come en greet the family’,
brûk hjir yn ’t wurk gjin eigen taal,
it Valk hotel lit gasten winne.
Oranje ûnder, boppe-oan it read
fan demonstrearje wat jim kinne:
kom no op foar ’t eigen rjocht
as dielgenoat fan ’t kapitaal…
der falt hjoed noch in wrâld te winnen.
april 18, 2022
Wat kin ik der no oan dwaan
dat stiel my foar de eagen komt
wannear’t ik moarns myn rûte rin
nei ’t slachfjild, grien fan kamûflaazje…
koene wy ús slach mar slaan.
Nee, net keare ’t oare wang
ta as it iene krijt in klap,
dat wurd hat stielhurd no gjin sin
mei klusterbommen foar de boargers…
binne wy foar ’t slaan te bang?
Wis, dy slach treft elkenien,
net inkeld op dat oare wang,
mar fan de krún sa nei it kin
en fierder nei de beide skonken…
transformearje wy yn stien?
Stiennen bliuwe op har plak,
bewege net nei ’t slachfjild ta
om mei te dwaan oan it ferrin,
sadat it rjocht ferslacht dy naasje
fan ‘wy krije ús gerak’.