Archive for the Lyrysk Deiboek category

Hy hâldt de rêch de ieu troch rjocht
en rjochtet ek de earms foar ’t lykwicht
om de stoarmen te trochstean,
hy boartet op ‘e boaiem mei it ljocht
lykas in bern, noch mannich jier te gean.

Mar as de wyn waait as passaat
en swypket dei en nacht de weagen,
dy’t ferfrette it koraal,
dan spilet net in beam mear foar soldaat,
fertelt it rotsplato in oar ferhaal.

It sie skeat woartel yn de skreef
en groeide út ta stam en tûken,
dy’t har bûgden op ‘e wyn,
lykas âldman fergroeid, de bonken skeef,
mar taai as hier de fiere takomst yn.

It kniep derom yn febrewaris:
wie it iis wol út ‘e Houkesleat
of moast de Wetterpoarte brekke,
slimmer noch, de finish op ‘e Bonkefeart.

’t Gie om de smaak yn swiete bekken
yn it lange, kâlde winterskoft,
de sjerp wie glêd en liet wol glide,
dûbeldik of tinne flinters yn in kloft.

It waar sloech om, ’t waard sêft as side,
suver cruisetiid yn in krisisjier,
de Wetterpoarte koe doe brûze,
sjerp en poeiersûker kleefden yn it hier.

Wêr’t palmen yn de tropen rûze,
hawwe cruisetoeristen gjin ferlet
fan glêde sjerp of poeiersûker,
mar geane jûns yn gala foar ’t buffet.