Archive for the Lyrysk Deiboek category

Kin in moarn noch moaier wêze
as it blomte wekker wurdt?
De krûden piipje ’t wite liet,
rûnom is ’t bûtermerk te lêzen,
wylst in frommes mei de flagge stiet.

Mei har kleuren lit se witte
dat se ’t foar de maitiid docht
sa ier en strieljend yn de moarn,
se kin har mei de blommen mjitte,
mar de flagge falt wol út ‘e toan.

Dan beweecht se beide earmen
wylst it read him no bewiist
foar fytsers boppe ’t bûgde stjoer.
Wa hat noch each foar kleur yn bermen?
Yn de fierte wankt de Jouster toer.

It is foar mannichien de wetterdream
dy’t nei de oare wâl ta lûkt:
it batsen troch de weagen
of it driuwen op ‘e stream,
it is mar wat men dêrfoar brûkt.

Wês wolkom op it skip ‘Salvinia’,
wy strike salve op jim hûd
en drippe yn de eagen
bylden fan net oars, mar sa
foldocht de hiele kloft it goed.

Stap mar oan board en smyt de touwen los,
earst achterút, dus pak de kloet,
do hoechst net yn de beage,
want de motor komt fan pas
en draait op nostalgy wol goed.