Archive for the Lyrysk Deiboek category

It wykein rint de flesse oer,
de pils streamt troch de Snitser grêft,
want elk drinkt neffens rjocht en wet,
wat folge wurdt troch strakke striel en boer,
it frije libben hoecht net sêft.

De wurkers rinne har yn ’t swit,
de ynset is wiswier net lyts
foar drinkers en it kabinet
dat driuwt op lege flessen, mar sjoch dit:
it lean foar wurkers is in fyts.

Wy rinne tusken ’t beamteguod
en binne mei in keppel, heite,
simmerdeis it koele skaad
en yn it foar- en neiseizoen de lijte,
kom mar op, wy gean net fuort!

Dêr stean ik dan, al is ’t noch wif,
’t moat wêze yn it lege midden,
mar ik wit fan plak noch paad,
sit fêst oan mem mei withoefolle triedden,
as ik grut bin, kom ik grif!