Archive for the Lyrysk Deiboek category

In fingerwizing tsjin de blauwe loft:
wol sjen nei libbensrin
en sa’t ik no noch bin,
lit my hjir stean foar ’t lêste skoft.

It wurke goed, it gie foar wis omheech
en op ‘e breedte ta,
it libben woe ’t sa ha,
mar oan de ein ferrûn it dreech.

De bêste maat waard doe de bûnte spjocht,
dy’t hakke nei syn aard
en sette op ‘e kaart
wêr’t libbensnocht al lang om socht.

In iepen keunstwurk tsjin de blauwe loft:
wol sjen nei de struktuer
en kleur fan de natuer,
de keunstner wurke hjir in skoft.

Wolkom, freugde fan de bloei,
wês wolkom foar de slinger,
skonken foar- en achterút,
span de spieren, ek yn ’t kút,
want heger wiist de finger.

Soargje, freugde, foar de groei,
fan hûs út bist in swinger,
draai noch ien kear yn it rûn
foardatst ferlitst de fêste grûn,
want heger wiist de finger.

Gean mar heger op dyn flecht,
nei ’t bloeien komt de simmer,
lang de dei en koart de nacht,
do hast it lykwicht yn de macht,
noch heger wiist de finger.