april 9, 2023
Syn bertestjer joech strieljend ljocht,
lykas de wizen witte lieten,
sa’nien waard doe wrâldferneamd
en soe syn ljocht grif skine litte,
mar it is de fraach wat hy hjoed docht.
Hy wie in Joad, gjin moadegril
woe hy de minsken hearre litte,
mar de wierheid, dy’t men neamt
te radikaal, dus lit mar sitte,
op Goed Freed briek men syn lea en wil.
Op Peaskemoarn, sa’t men doe sei,
kaam hy it grêf út, wer ta libben,
rekke dêrtroch wrâldferneamd,
syn ynfloed koe men amper mjitte,
’t is de fraach hoe sit it hjoed de dei?
De Joadestjer mist hjoed it ljocht
en alle grêven bliuwe sletten,
opstean docht men yn de wrâld
tsjin ûnrjocht lykas hy ek witte
liet en die, de fraach is wa’t dat docht.
april 3, 2023
De fraach is: kin de flagge wol yn top
no’t hjoed it leechste punt berikt is
mei de lêste peal it alderdjipst
om in heech gebou te dragen
foar wa’t âld wurdt mei in oantal fragen.
It antwurd hâldt de bou perfoarst net op,
men wol it heechste punt berikke,
want de âldste bûsen stekke djip
om it kapitaal te dragen
dat net opgiet yn in âlde mage.
Sjedêr de stam, dy stribbet hegerop,
wa wit hoe djip syn woartels stekke
no’t de beam de âldste rjochten hat
om natuerlik frucht te dragen,
wat syn kapitaal is sûnder fragen.