Archive for the Lyrysk Deiboek category

Wurkje, wenje, wille
wol it jongfolk wol op ta,
want wa wol net in glimke ha
fan yn it wykein chille.

Hâld goed koers mei klauwen
nei it kapitale oard,
wa’t soks net kin, giet troch foar kloat,
de aap komt út ‘e mouwe.

Fyftich flotte fammen
sykje hearen yn it griis,
dy’t trochgean foar it slach healwiis
om ien kear noch te flamjen.

Pubers, smyt jim slogans
tsjin de saaie polityk
en skatterje jim tosken bryk:
se fine jim ûndogens.

Sy kronkelje ornaris yn de grûn
troch drek en modder hinne,
skite ek wer modder út
en ha in hekel oan de sinne.

As dynjetarissen mei glêde hûd
beknipe sy yn ’t tsjuster
mollen, want soks komt goed út,
nea reitsje sy it sydpaad bjuster.

Sy komme inkeld foar it sinneljocht
by trillings fan de ierde,
want dan reitsje paden rjocht
dy’t nei de bleate wierheid liede.

Dan kronkelje se noch in dei of wat
yn eigen slym bewuolle,
gjin ûntkommen oan har lot
besykje sy mei ’t liif te dollen.

Ik hie hjoed oanstriid foar in hurde traap,
mar koe ’t noch krekt foarkomme,
want sy leine al foar aap,
mar earlik wier, ik sei ferdomme.