januari 2, 2017
It berne-aard is optimistysk:
troch wolken hinne skynt de sinne,
oer it wiet strykt altyd wyn,
in koeltsje hâldt de gong deryn
om eigen stiltes te oerwinnen.
Mar as de wyn ynienen útsjit,
de skoat te fêst sit om te fieren,
’t wetter oer de râne rint,
it bearen ’t fan de stilte wint,
dan kin gjin kleur de boat fersiere.
De kleuren lizze yn it wetter,
de optimist stekt op de holle,
ropt de help yn fan stand-by,
dy’t hieltyd rekket yn de draai,
it weaget sa al gau tefolle.
Sjoch, beide bliuwe optimistysk,
om’t sy elkoar al langer kenne,
komt de optimist wiswier
oerein mei yn it seil it wier…
moarn wurdt de wiere siler berne.
december 31, 2016
Lit de beammen net mear swart,
mar sier dy mei it wyt fan ryp,
wat sprekt fan fûle kjeld,
sadat gjin skip mear fart
en iis in strange winter meldt.
Lit de kleur fan markols swart,
gjin wjuk wurdt troch de ryp beslein,
ferstive troch de kjeld,
dat elk te fretten hat,
omdat ek dan it libben telt.
Jou it iis in swarte tint
en lit it groeie dei en nacht,
wat sprekt fan fûle kjeld;
dat is al fêst de hint
foar elk dy’t priis op alve stelt.
Lit fan swart it wurde wyt
fan justjes lok yn hiel it jier,
dat him hjoed knallend meldt
en gau al fierder glydt,
lit sjen dat elke oere telt.