juli 31, 2017
Tusken wiet en wolken
komt de takomst tichterby,
de fuortgong eaget frij…
gjin flot fan swiere balken.
Glidend oer it wetter
mei de peddel foar de gong,
begjint it lykwicht jong,
de swierte komt earst letter.
Frij fan drege boeken,
mar ferplichte is it fest,
diskusje hat der west
oer fan de planke dûke.
Frijheid om te kommen
wêr’t de oar dy hawwe wol,
men hâldt dat net lang fol…
hy hat it derfan nommen.
juli 24, 2017
De iene wente seit de oare net,
de boeren hechtsje oan tradysje,
bliuwe op it âlde plak;
wa’t heger fljocht, klimt nei in flat
en komt dêr feilich ûnderdak,
’t ferskil is mear as mar in bytsje.
De boer syn wente sjocht der net nei út
dat dêr de bern de kost wol krije,
’t hûs is ta oan ûnderhâld,
it siicht al lang troch ’t bopperút,
de spikers meitsje ’t libben kâld…
tradysje rint dus út op lijen.
Projektûntwikkeling fertsjinnet mear
as kritysk it moderne hifkje,
sjoch de flat as topmodel,
dus oan de arsjitekt de ear,
hy lei him net by ’t âlde del,
hat oer ’t ûntwerp net stind of wifke.
