Archive for the Lyrysk Deiboek category

Rôljend de draai fine

It rôlet stadich oer de Grienedyk,
want de rollator wol net hurder
as twa fuotten, oanstjoerd troch de geast
dy’t efkes bûten westen wie,
mar hjoed fielt hy him ryk.

Hy wie it giseljen fan crossen wend,
de motor alle kearen hurder
mei ’t ultime doel fan ‘ik wurd earst’,
omdat er wer twa knibbels hie,
foar him folslein bekend.

Syn motor crosste sa’t er hawwe woe,
mar hurder soe ’t perfoarst net wurde:
crashend kaam er op ’e hurde grûn,
wist efkes net wat hy dêr die
en wat hysels noch koe.

Draaibonken stikken yn de rêchkolom…
wat soe de takomst foar him wurde?
Rôljend hat er dochs syn draai wer fûn,
de geast joech him in goede rie:
de Grienedyk mar om!

Einekroas

Wurd wekker, de sinne is op
en fervet de snilen al grien,
wa stekt dan net heger de kop,
hat lang op ien poat hjir al stien,
sa klinkt de kwêkjende rop.

De lêch is al wiken wer út,
it kroas is it wetter oerflein,
’t wie neffens it memme-beslút
dat piken feroarje yn ein,
sa klonk de kwêkjende tút.

Hâld op mei ’t betide gerop,
de sliep ha ik lang noch net út,
lûk leger it kwêkjende krop,
sjoch hoe’t hjir it kroas my omslút,
dus is it lang noch net op.