juni 4, 2018
It kin, sels middenyn de winter
brekt it rûzjen fan de see
ek troch yn Snits;
dêr stean ik as Jan Splinter
op lekke skuon, mei tichte noas
dy’t mar net rinne wol…
ynienen komt de flits.
De wjerljocht bringt my op Bonaire,
lang al ’t favorite stee
om op te gean
yn sfearen fan tegearre
djip dûke mei in tichte noas,
oars rint dy samar fol…
wêrom bliuw ik noch stean?
Jan Splinter leaut net yn it wûnder
fan in tas dy’t fleane kin
as yn in flits;
al is dy tas bysûnder,
mei ’t rûzjen fan de see hiel oars
as ien dy’t foller wol…
dus bliuw ik mar yn Snits.
mei 28, 2018
Hoe lang kin men it rjochtop hâlde?
Faaks wol hûndert jier,
teminsten as de rêch it rêdt
om net te bûgen foar de âlde
dei, it libben sêd.
Mar beart de stoarm troch lette blêden,
hâldt de stam yn ’t spier,
dan kreaket hiel it bonkerak
en is it libben net te rêden,
klinkt ferskuorrend… krak.
Hoe lang sil ’t leuninghout it hâlde?
Wurdt de ferve skier,
dan is ’t in spul fan waar en wyn,
’t giet djipper as mar licht ferkâlden,
’t hâldt fernijing yn.
