mei 6, 2019
Wêr’t de fijân earder klearstie
om it bolwurk oan te fallen,
syn slachoarder stie op kommen,
Snits wist him gjin rie,
dêr bloeie hjoed de blommen.
Wêr’t de boer syn preamke klearlei
om dêryn it hea te laden,
dêrnei efkes te bekommen
foar’t er socht syn wei,
dêr bloeie hjoed de blommen.
Wêr’t de rider hastich trochried,
streekrjocht op ’e Westersingel
om yn Ljouwert oan te kommen
nei in swiere striid,
dêr bloeie hjoed de blommen.
april 29, 2019
Mei twa wjukken op ’e lampe,
sa komme sy foar ’t doel teplak,
yn ’t foarste plak om út te sjen,
de koppen yn deselde rjochting,
dêr ’t in earm klimt nei it dak…
sy fiele tagelyk de krampen.
’t Ljocht giet út, de trije bollen
ha yn de nacht har plicht wer dien,
sadat it paad is goed te sjen,
dat is it doel fan de ferljochting,
dat fan har bliuwt net by ien…
sy moatte ’t kwyt, ’t wurdt har tefolle.
Sa… de earm klom rap nei boppen,
dat sûnder wjuk kaam hy teplak
dy’t glêzen wasket foar it sjen;
al is it yn deselde rjochting,
minsken hâlde har gemak,
wylst kôben draaie drok de koppen.
