december 30, 2019
It slacht der as de bliksem yn
by my: de frijheid wurdt wer troffen
troch de macht dy’t gjin beheining ken:
diktators litte ’t byld ûntploffe.
Lykas mynhear de presidint,
dy’t fan gjin rjochte wegen witte
wol, de leagens sprekke elkoar skjin,
de smoargens rint troch buormans strjitte.
De tonger rôlet oer de wrâld
en lit de bange frijheid trilje;
wa’t tiran wurdt, sprekt him út: ‘Ik bin
de earste om ferset te stiljen.’
It slacht wer as de bliksem yn
as ’t Frijheidsbyld fan ’t plak feroare
is, ik hear har stille stim: ‘Ik rin
om hjir de frijheid oan te boarjen.’
december 25, 2019
Wa bin ik, al jierren sykjend
nei ’t mystearje fan it bern
dat alle kearen berne wurdt,
al wer is ’t yn desimber.
Dêr rin ik om te ferlykjen
tusken hjoed en ’t jier derfoar,
it berntsje is noch like grut
op ’t feest fan ein desimber.
Wat kin my dan noch ferrykje
op ’e jierdei fan it bern?
Ik sykje tekens nêst it wurd
en fyn dy yn desimber.
Mear as tûzen swarte ingels
hâlde koers oan op ’e stêd,
se lykje swart fan kop oant sturt,
mar binne wyt as ’t daget.
Yn de stêd sjoch ik foar ’t finster
yn de earmen fan de mem
it bern, noch altyd like grut,
ik bin der as it daget.
