september 9, 2020
Der is wol kar om te parkearen:
links ôfslaan of leaver mar rjochttroch,
it antwurd op wêrhinne,
wurdt hjir oanjûn… sjoch…
De iene pylk ferwiist nei’t skyen,
mar wol oars as by de hichte del,
it giet oer ’t wetter hinne,
fleane op bestel.
De oare pylk wiist op in tsjerke,
dy’t it folk hjoed opropt ta de doop,
dêr kin men net omhinne,
want sa is der hoop.
De skyers bliuwe mei de holle
boppe wetter, ek al giet it mis,
it doopfolk dûkt derûnder,
fan har heil al wis.
september 7, 2020
It wie net om de toer te dwaan,
hoewol’t dy dúdlik kaam yn byld,
it rûn tsjin healwei fjouweren;
it wie de dei fan byld nei byld,
it is mei sizzen net te dwaan.
Hy* wie gjin man fan ’t lêste wurd
en swijde leaver, hold him stil
wylst hy mei ien each skildere;
hy rekke fierste ier út byld,
syn bylden komme no oan ’t wurd.
De bylden litte him ek sjen:
de skilder mei in eigen styl,
dy’t each foar ’t Fryske lânskip hie,
it kaam dynamysk klear yn byld,
men kin it tusken wurden sjen.
* Marten Groenhof silger
