augustus 25, 2025
De planten skokke fan de skrik
en spanning hoe’t it komme sil,
natuerlik libbet alles mei
it dier dat him net rêde kin,
want swimme sit net yn de genen,
boppedat rint it tsjin melkerstiid.
It jaar waard stadichoan al dik
en joech it lêste setsje yn
de weake ûnderwâl, sadat
it brein de plûns net mije koe,
hoewol’t de genen protestearren,
want al gau rûn it tsjin melkerstiid.
De ko joech by de strûp gjin kick,
de eachopslach sprekt wol fan ‘sil
de boer my rêde út ’e need?’
De trekker lûkt it tou sa strak
dat ek it jaar komt út it wetter,
krekt op tiid, op slach fan melkerstiid.
augustus 17, 2025
De reiden ha de slach ferlern,
de weachslach friet de woartels los
en fierder ek de fêste grûn,
sadat it paad bedrige waard
dat nei de takomst rûn.
It wrâldfolk rekke yn panyk
en sloech it paad yn nei de berch
om frij te wêzen fan it lot
dat driigjend ûnder harren lei,
it skûlplak wie de grot.
De ierde skodde fan ’t klimaat
dat hearske ûnder ’t bange folk;
der kamen tal fan rotsen del,
dy’t bolderen fan pak ús fêst,
jou jim der net bydel.
Elk naam in rotsblok op ’e rêch
en sjoude dat nei ’t iepen plak,
dat slach nei slach bedrige waard,
de reiden rûsden foar it folk
dat hearske oer ’t klimaat.