februari 12, 2025
Lit net de snie ús lea bedrige
mei in fal dy’t útrint op in brek,
mar sjoch hoe’t ôffal der net is,
de wite wrâld fan klearens sprekt,
mar skyn kin dûbel lige.
Yn ’t foarste plak troch glêde planken
dy’t in flok oproppe of: ‘Ferrek,
gjin poat ferset ik mear, ’t is mis!’
Wa tinkt der dan noch oan it stek
of heart swart-wite klanken?
De snie kin ús swart-wyt bedrage
troch de macht dy’t opslacht as in gek,
sadat de wrâld fan neat mear wis
is, kealens heech de kop opstekt,
it reid mist griene kragen.
Lit net de winter oer ús komme
mei it iene nei it oare wek,
wit dat it ôffal tydlik is
dat yn it Wite Hûs no sprekt…
lit dat yn drek omkomme.
januari 15, 2025
fan George Orwell*
Wa’t dyn grutte broer eins is,
hoecht dochs gjin fraach te wêzen?
Pratend rint er mei dy op:
‘Hoechst net yn noed te sitten,
kom oerein, do rinst gjin risiko…
sjochst it mei my sitten?’
Lytse suske wit it wis:
‘Myn broer kin ik fertrouwe
op syn wurd, mar hoe’t it sit
mei twa pear skerpe eagen
fan de achterbakse manager…
wier, it is gjin leagen.’
Grutte broer dy’t oeral is,
lit nimmen yn it wêzen
fan in minske mei in hert
dat kloppet ek foar oaren,
rint it troch, dan rinst gjin risiko,
hast de koers feroare.
* George Orwell (1903-1950)
Boek ‘Big Brother is watching you’