november 20, 2022
fan Léon Frédéric*
Linkerpaniel
De kjeld loek harren troch de lea
as sapiens yn iere tiden,
mar better wisten sy doe net,
sy samlen wat te iten wie
en leine harren derby del
dat elkenien glied nei de dea.
Rjochterpaniel
In swan stiek noch de wjukken út
doe’t hjitte tiden letter kamen
oer bleate liven yn de mar,
dy’t samlen wat te krijen wie,
sy joegen har der mar by del
en kamen net ta in beslút.
Middenpaniel
Bern krigen noch in lêste kâns
en lieten lieders poerlilk witte
dat sy wol kamen ta in kar,
sy samlen alle CO2
en sprongen spattend op en del,
de beek brocht harren yn balâns.
* Léon Frédéric (1856-1940)
Trijepaniel ‘Gletsjer, mar en beek’
november 17, 2022
fan Francisco José de Goya*
Hjir stean ik dan yn fol ornaat,
Francisco José de Goya,
mei yn de linker it palet,
de rjochter strykt mei it pinseel
de kleuren op it skilderij,
sa kom ik steande op ’t portret.
Myn eagen binne rap paraat
as bûten wat te rêden is
wat my rûch rekket yn it moed,
it drama komt dêrnei op doek,
sa kleurje ik de werklikheid,
dy’t sjen lit wat der floeit oan bloed.
It is net oars, ik kriich as maat
de bril, myn eagen waarden min
fan ’t sjen wat kaam op ’t selde del:
ellinde yn de maatskippij,
dy’t kleure mannich skilderij…
op ierde is it faak in hel.
* Francisco José de Goya (1746-1828)
Skilderij ‘Selsportret yn it atelier’
Skilderij ‘Selsportret’
