februari 16, 2023
fan William Etty*
Skieden waard har libben troch de see,
mar koe dy harren leafde keare?
Hero wachte nachts Leander op,
dy’t har mei hert en siel fereare.
As de prysteresse fan it ljocht
hold sy de fakkel yn de hichte,
fielde troch de lea de herteklop,
dy’t sterker wie as al har plichten.
Swimmend hold hy nachts it ljocht yn ’t each
om streekrjocht nei har ta te kommen,
syn kondysje weage nei de top,
wylst rûnom him de brâning skomme.
Op in nacht stiek op in stoarm, dy’t him
syn krêft en har it ljocht ûntnommen
hat, doe stûke ek de herteklop,
sy sprong, is sa om ’t libben kommen.
Foar’t sy noch har lêste siken joech,
koe sy him krûpende berikke,
lei de fingers op syn kâlde hals
en preau it sâlt dat sy opslikke.
* William Etty (1887-1949)
Skilderij ‘Hero en Leander’
februari 9, 2023
fan Grigori Grigorjevitsj Gagarin*
Se binne oan de hichten wend,
dy’t har it sicht ûntnimme
op wat oandriuwt fan de kym,
de bui dy’t ûnferwachts ferriist…
wa doart dan noch te klimmen?
Se binne ek oan ’t streamen wend,
it kolkjen fan it wetter,
dat net oandriuwt om dêrtroch,
it is de plicht dy’t harren wiist
it paad, der is net better.
It giet earst nei de djipte ta,
it hoars hâldt har op hichte,
dat drûch komme se dertroch,
it is de bui dy’t har oangriist
mei lading nei de lichte.
* Grigori Grigorjevitsj Gagarin (
Skilderij ‘De oerstek fan in rivier
troch berchbewenners’