januari 26, 2023
fan Jean-François Millet*
fan Paula Modersohn-Becker**
Wylst rike boeren folop rispje,
bûge froulju nei de keale grûn,
de hân útstutsen nei wat
oerbleaun is, har wurk oant yn de jûn.
De dei is lang, it moat hjoed barre,
oars ha oaren al wat oerbleau fûn,
wat har perfoarst net barre
mei, sy libje fan de rike grûn…
… oant sy net langer bûge kinne,
inkeld noch de holle foar har God,
om’t sy oant no ta sparre
binne, wol tefreden mei har lot.
De fingers hoecht de frou net mear te
bûgen, inkeld foar de fingerhoed,
de blom dy’t sy hjoed plôke
hat foar ’t earmhûs, dat befalt har goed.
* Jean-François Millet (1814-1875)
Skilderij ‘Froulju dy’t ieren sykje’
** Paula Modersohn-Becker (1876-1907)
Skilderij ‘Alde frou út it earmhûs)
januari 19, 2023
fan Gustave Asselbergs*
Lit komme út ’e massamedia
de massa fan it witten
dat ferwurke wurde moat:
in middel tsjin ferjitten.
It felle giel fan de yntinse haat,
read bloed, massaal fergetten
foar it leave heitelân,
sa is op slach besletten.
It pears dat mongen is fan blau en read,
blau bloed dat stelt de wetten
fêst foar Jan, gewoan soldaat,
syn dea is gau fergetten.
Fiktoarje klaait har yn it felle wyt
dat streekrjocht rint op frede
út, wat alles yn him hat:
wei fan gefoel en rede.
Zelenski wiist nei ’t byld fan Churchill,
fan boargers en soldaten
yn it frije heitelân,
sa wurde lieders maten.
* Gustave Asselbergs (1938-1967)
Kollaazje ‘Fiktoarje’