april 27, 2023
fan ûnbekend*
fan Sjoerd de Vries**
Syn heit sit op it helmhout,
mar hy stiet as skipper oan it roer
om mei syn neisten troch de tiid te gean,
it hold oan board net oer.
Syn mem stiet op ’e lûken,
moast har rêde yn de lytse roef
om mei har neisten troch de tiid te gean,
it wurk oan board wie stûf.
Sjoerd hat oan board net wenne,
berne waard er yn in wente oan
de wâl om mei syn maten troch de tiid
te gean… as skipperssoan.
As keunstner liet er him al
kenne doe’t er noch op skoalle siet,
ferkocht oan maten wat er makke hie,
sa kaam er troch de tiid.
Syn âlders seach er foar him
as de skipper en de skippersfrou…
yn byld, mei him foar altyd troch de tiid,
hy bleau syn ôfkomst trou.
* Foto ‘Skûtsje De jonge Aaltje’
** Keunstwurk ‘Portret fan myn âlders’
april 25, 2023
fan Abraham van den Tempel*
Hjir stean ik dan mei fjouwer hûnen,
ja, ik nim se mei op jacht
om achter hazzen oan te jeien,
nee, ik nim mysels yn acht,
dus bliuw ik stean wêr’t ik no bin.
Ik bin fan heech komôf, dat sizze
se, in oerwûn keningsbern,
dat bûtendoar de septer swaaie
mei, dat is my oan te sjen
mei stôk en sjerp, sa’t ik hjir stean.
Rûnom stean ik bekend, yn Hollân
wie myn heit al kening ôf
nei’t hy yn Ingelân de septer
swaaie koe, trou oan syn frou,
yn Hollân net, syn soan bin ik.
In fearnsiuw letter siet James finzen
yn de Tower, mei de dea
foar eagen, sûnder trouwe hûnen,
doe op jacht yn Hollâns gea,
mar jierren letter wie er bút.
* Abraham van den Tempel (sirka 1622-1672)
Skilderij ‘Portret fan in jonge fan adel (James Scott)