april 25, 2023
fan Abraham van den Tempel*
Hjir stean ik dan mei fjouwer hûnen,
ja, ik nim se mei op jacht
om achter hazzen oan te jeien,
nee, ik nim mysels yn acht,
dus bliuw ik stean wêr’t ik no bin.
Ik bin fan heech komôf, dat sizze
se, in oerwûn keningsbern,
dat bûtendoar de septer swaaie
mei, dat is my oan te sjen
mei stôk en sjerp, sa’t ik hjir stean.
Rûnom stean ik bekend, yn Hollân
wie myn heit al kening ôf
nei’t hy yn Ingelân de septer
swaaie koe, trou oan syn frou,
yn Hollân net, syn soan bin ik.
In fearnsiuw letter siet James finzen
yn de Tower, mei de dea
foar eagen, sûnder trouwe hûnen,
doe op jacht yn Hollâns gea,
mar jierren letter wie er bút.
* Abraham van den Tempel (sirka 1622-1672)
Skilderij ‘Portret fan in jonge fan adel (James Scott)
april 20, 2023
fan Rembrandt*
Wurdt in bline ea ûnstjerlik?
Lit it antwurd libje troch de tiid
mei wurden dy’t net stjerre kinne,
klinkend yn ’t antike liet.
Lit Homerus mar fertelle
mei it each op spanning yn ’t ferhaal,
de skriuwer soarget mei de pinne
dat it komt yn kleare taal…
… op papier, de Ilias en
Odyssee, ferhalen ek oer striid,
dêrnêst foar yn ’t bestean te winnen
wiisheid, klinkend yn in liet.
Wurdt in bline ea ûnstjerlik?
’t Antwurd komt fan Aristoteles:
‘In bline lit syn tinzen rinne,
jout oan filosofen les.’
* Rembrandt (1606-1669)
Skilderij ‘Homerus diktearret syn fersen’
Skilderij ‘Aristoteles mei de búste fan Homerus’
