Archive for the Keunst category

It spant derom, dit is ’t momint
dat Telemachus, soan fan Odysseus,
nei Mentor keart it linkerear;
hy is ferheard, snapt net de hint
oer bôge, koker, pylken mei in fear
fan heit, al jierren fuort en nea werom.

Hy gie op reis, de wrâld wie rom
en rôp him foar de lange odyssee,
in ivichheid fol aventoer;
syn frou, dêr kamen frijers om,
dy’t tochten, ’t is mei Odysseus wol oer,
mar Penelope bleau him treurjend trou.

Sjedêr ’t momint fan Mentor: ‘Jou
de bôge oan dy man, ’t is Odysseus,
dyn heit, hy is werom, stiet klear!’
Hy spant, de frijers fan syn frou
ferlieze ’t leave libben foar de ear
fan Penelope, foar de neisten rou.

* Giovanni Battista Tiepolo (1696-1770)
wie in ferneamd dekorateur fan muorren
en plafonds yn paleizen en tsjerken,
skilderingen fol beweging yn tsjinstelling
mei dit skilderij, dat in momint fan stilte
sjen lit.

Hy wie in nuverling út Amsterdam
en libbe yn de Frânske tiid
as kluzener mei frjemde nammen,
samar lôge op de flam
fan heechmoed en fan striid.

De slach by Nieuwpoort wie syn ideaal
as skilder fan it grutte doek:
it libbensechte panorama
fan soldaat oant generaal,
yn heechmoed wied er tûk.

Fan oarlochsstrategy nei de muzyk,
fan generaal nei dirigint
of learaar fan twa leave dames,
oan de wikseling wol wend,
hie hy altyd gelyk.

* Louis Moritz (1773-1850)
wie yn syn tiid tagelyk frjemd en ferneamd.
Troch de útstalling fan syn panorama
‘Slach by Nieuwpoort’ fertsjinne er in lyts
kaptaal. Op it lytse skilderij ‘De muzykles’
hat er himsels yn de rol fan muzyklearaar
útbylde.