Archive for the Keunst category

Dêr sit er dan mei trije kear it read,
de paus, as Petrus minskefisker
en as Kristus freonlik: ‘Folgje my.’
De ienfâld fan syn lege steat
ferblidet leken: ‘Heit, hjir rinne wy!’

Al fiifensantich, dan noch sa fitaal
en kreas as Petrus, minsketysker,
eagen fol fertrouwen: ‘Kom by my.’
In mûle mei in gol ferhaal,
dat leken roppe: ‘Heit, hjir binne wy!’

Doch ôf dy klots en cape fan glimmend read,
lit sakje ’t kleed en sis as wize
yn de lange ûnderbroek: ‘Jim folgje my?’
De ienfâld fan syn hege steat
lûkt minsken oan: ‘Ja, Kristus folgje wy!’

* Diego Velázquez (1599-1660)
waard berne yn Sevilla
en wie skilder oan it hôf
fan kening Filips IV.
Hy skildere realistysk,
net moaier as de minsken wiene.

Fenetië, stêd mei wetter nei de wrâld,
de bloeitiid is foargoed foarby,
de tiid fan skippen oeral hinne;
de fûneminten binne âld,
derboppe wurdt net boud foar nij,
de rike sil der nea oan wenne.

Fenetië, republyk mei minder macht,
hoewol’t Vivaldi klinkt rûnom
en feesten ’t fan de earmoed winne;
it masker is foar dei en nacht,
dat nimmen sjocht fergiene rom
of grauwe wolken foar de sinne.

Fenetië, hearen, dames fan it jild,
dat spilet noch in grutte rol,
om’t sy net sûnder gokken kinne
en witte hoe’t it masker fielt:
in ûnbekende hâldt it fol
en kin yn bloei oer strjitte rinne.

* Pietro Longhi (1702-1785)
hat op lyts formaat in protte sênes
út it libben fan Fenetië útbylde.
Skilderij ‘Il Ridotto’ (‘De Spylseal’).