Archive for the Keunst category

Sjedêr de helden fan de fierste grinzen
fan ’t ûneinich Russysk ryk,
dat skôge nei de tsaar as god,
sy kearden de Sinees en Gryk,
yn bûnt ferskaat dochs patriot.

Sy skôgen fier en hiene oars gjin tinzen
as de fijân, hâld him tsjin,
want dravend sjen wie ’t heechste lot,
it bûnt ferskaat hie inkeld sin
om’t Ruslâns tsaar wie harren god.

Tsaar Alexander seach oer fiere grinzen,
want gjin ein kaam oan syn macht,
ferstive oan de ein as byld, syn lot
wie lykas Bogatyrs op wacht,
hy stie foar god en patriot.

* Viktor Vasnetsov (1848-1926)
Skilderij ‘Bogatyrs’
Monumint ‘Tsaar Alexander III’ 

De ieuwen hat er al trochstien,
de katedraal fan Frânsk Rouaan
mei poarten, bôgen en timpaan,
moarns ier, by mist, min waar en sinne,
ljochteffekten op it hôf fan stien,
dêr’t hjoed de dei noch Eva’s rinne.

Hy hat miljoenen jierren stien,
de poarte fan Frânsk Etretat
mei ’t stienplato der noch op ta,
dêr’t mânske weagen stikken rinne,
ljochteffekten op in beam fan stien,
dêr’t hjoed de dei de Adams winne.

Se sprongen fier fan stien nei stien
as keardels fan har krêften wis
sa’t prehistoarje foar har is,
wylst sy yn ’t hôf fan stilte binne,
miseffekten sa’t it ieuwen gien
is om in kromke heil te winnen.

* Claude Monet (1840-1926)
Skilderij ‘Katedraal fan Rouaan’
Skilderij ‘Manneporte by Etretat’