Archive for the Keunst category

Behalve Axel mei
syn stôk, dy’t kjeld noch klok fernommen
hie, omdat it him net lei,
it koe him neat ferdomme.

Behalve Beda yn
de pronk, dy soe him grif net mije,
as it moast, koe hy har blyn,
mar klear, foar eagen krije.

Se seach syn eachopslach,
de stôk dy’t sa nei foaren sjitte
koe en stapte mei ferdrach
foarby, hy hat it litten.

Yn tsjerke seach it swart
fan manlju dy’t de draai net litte
koene, each en ear tekoart,
mar wol in earm foar ’t stjitten.

* Akseli Gallen-Kallela (1865-1931)
wie in Finske keunstner, dy’t ûnder oare
it plattelânslibben skildere.

Hy troane heech as god
en seach op ’t boulân del
dêr’t hy de frucht fan iet
en hearske oer de boer syn lot,
mar waaard fan ’t eigen folkje kjel,
wat oan Saturnus friet.

Bang wied er dat syn troan
beset waard troch de bern,
it ieuwenâlde liet,
dus pakte hy syn âldste soan,
it jonkje wie folslein ferlern,
want heit Saturnus friet.

God Kannibaal koe ’t lang
net op, der bleau wat oer,
de lea fan ’t goadebern,
symboal dat sels de heechste rang
as boal benaud bliuwt foar de boer…
sels goaden gean ferlern.

* Francisco Goya (1746-1828)
makke op ‘e muorren fan syn fila
in searje ‘swarte skilderijen’,
dêr’t ‘Saturnus’ ien fan is.

** Théodore Gericault (1791-1824),
in pionier fan de Romantyk,
konfrontearret de taskôger mei
in tryste fyzje op it minskdom.