Archive for the Keunst category

De kjeld kaam út it easten wei
en fierde ek de dize mei,
in twaspan dat oer Finlân sette,
yn de nacht syn spoaren achterliet
op alle beammen dy’t it mette.

De bjirken, noch foarhinne keal,
in libben yn de winter heal,
besoarge ’t twaspan folle tûken,
in klaaiïng dy’t dy beam estetysk stie…
oan kjeld en dize tank foar ’t brûken.

It twaspan ried it plak foarby
dêr’t lju beweegden harren frij
yn ’t neaken by it fjoer en wetter
fan de berte oant de keale dea,
mar klaaid mei waarmte stie noch better.

* Akseli Gallen-Kallela (1865-1931)
Skilderij ‘Berime bjirken’
Skilderij ‘Yn de sauna’

Hoewol’t de himel joech it sein
‘sawat foarby is dizze dei’,
joech noch de reek in heech protest,
de baas gie ’t jachtproses wer nei
fan bodders yn de bannen slein
fan ier oant let, dan noch de test.

De skilder lei it bûten fêst:
de grize reek tsjin ’t himelfjoer,
de dakken kleurleas troch de snie,
de strjitten yn de winterrêst,
mar ’t moast wol rap mei kâlde kloer
en noasdrip sa’t er klomjend stie.

Dochs doe’t er troch de skoarstien seach
it jachtproses en bodders bân,
gjin mooglikheid foar in protest,
gie troch syn lea in kâlde weach,
dy’t waarmte joech oan noas en hân:
hy fierde út syn eigen test.

* Claude Monet (1840-1926)
Skilderij ‘Winterstimming by sinsûndergong yn Argenteuil’