Archive for the Keunst category

It hoegde net om him,
mar fuort, hy hie der west,
by dy Etienne-Jean Georget,
de psychiater:
’t lei net oan syn stim,
de eagen wiene ek noch bêst,
it hie te krijen mei de wet.

It woe him earst net oan
en ek net yn him del,
want hied er net in fêste baan?
Dy psychiater
spriek op hege toan
oer paden nei de hel,
befluorre foar de kleptomaan.

Syn hannen wiene goed
genôch foar al it wurk
mei spul dat foar it gripen lei.
Dy psychiater
hie ’t oer ’t minne moed,
mar as gjinien syn aksjes murk,
dan kriich er ek de wet wol mei.

* Théodore Gericault (1791-1824)
skildere yn de praktyk fan psychiater
Etienne-Jean Georget
in searje fan seis portretten fan pasjinten.
Skilderij ‘Portret fan de kleptomaan’

Sy sjocht it lytse wrâldsje oan
mei grutte eagen lykas rotte jirpels,
en noas en lippen ek bedoarn.

Har mûle jout de krekte toan
fan jûntiidskleuren foar ’t folsleine tsjuster,
wa wit, sjocht sy de himel moarn.

De wrâld is grut sa’t sy dêr sit
yn ’t stamkafee, it eigen lytse rûntsje,
want neat wat sy foar oaren lit.

Sy sjocht harsels allinnich oan
mei eagen dy’t wat hawwe fan amandels,
al ryp, sy wachtet net op moarn.

De prúk ûntflammet fan har fjoer,
de reek giet nei in smookje ek nei boppen,
sy wit har himel hat gjin doer.

* Vincent van Gogh (1853-1890)
Skilderij ‘Kop fan boerinne’
Skilderij ‘Frou yn it ‘Kafee du Tambourin”