Archive for the Keunst category

Hy wie in held, gie rjocht troch see,
in ridder mei in eachopslach
dy’t yn de oar syn iris boarre,
oer it hier in helm fan brûns,
beskerme tsjin in fûle slach
en jûns mei ’t ealfolk oan de dûns:
de byldnis fan in orchidee.

Fan eagen is dan gjin ferlet,
hy hat it mei syn bloeien ret.

Sy dogge ’t inkeld op ’t gehoar:
de stôk dy’t op it snie-iis slacht,
de strykstôk op fioelesnaren;
hoeden is de klompedûns
oerdei, foar harren neare nacht
en glydt de foet, dan brekt de bûns
har op, de ien nimt mei de oar.

* Arthur Craco (1869-1955)
is foaral bekend wurden troch syn keramyk.
Byld ‘De orchidee’

** Anto Carte (1886-1954)
wie begien mei de swakken yn de maatskippij.
Skilderij ‘De blinen’

Yn ’t lânskip stiet de peal wer keal
nei tsien minuten mei de koer deryn,
it pypskoft is no oer,
it feangea ropt, mar eaget feal,
se steane sa wer yn de klyn,
want turf jout har it deistich foer.

De bulten wachtsje op ferfier
mei kroaden nei de lege skûten ta
en fierder nei it plak
dêr’t fjoer ferwaarmet hûd en spier,
sa wolle rike lju it ha
dy’t wenje ûnder ’t pannedak.

It feanfolk hat de loft as dak
mei dize, reinich waar en kjeld,
de pipe jout it fjoer,
se sjogge út nei har gerak,
mar ’t is de baas dy’t foar har telt
en hiset yn de peal de koer.

* Jacobus Sibrandi Mancadan (1602-1680)
wie in Fryske lânskipsskilder,
dy’t ek ynvestearre yn in turfgraverij.