Archive for the Keunst category

Hy hie it op ‘e tombe sjoen
en wist wat him te wachtsjen stie,
want doe’t er linich en noch sûn
wie, kaam er daliks ta de die.

Sa seach er him wer op ‘e Nyl
mei beide fuotten op ‘e boat
op fûgeljacht as nekrofyl,
omdat er fan dy liken hold.

Mar doe’t er sels op stjerren lei,
seach hy gjin inkeld lyk mear oan,
mar wol de tombe, dy’t him sei:
‘Sa siik as hjoed, sa sûn bist moarn.’

Hy seach it yn in fisioen,
yn ’t libben al of oan it krús:
it wie it hiele minskdom jûn,
Hy kaam mei alle oaren thús.

* Tombe fan Nebamun:
‘En dit is wat ik nei de dea doch’

** Tintoretto (1518-1594)
Skilderij ‘It paradys’

Hy stoarret ús mei grutte eagen oan
yn al syn keninklike pracht
fan stiennen, glês en goud;
se neamden him de goadesoan,
dy’t boppe ’t sljochte folk útriisde,
dat net oars die as syn lege plicht,
mar hy is dea, al mear as trijetûzen jier,
en lit him sjen yn ’t stedsmuseum,
inkeld noch syn deade-oangesicht.

Sy hâldt Him op ‘e skurte as in bern,
sa’t sy ek die yn Betlehem,
want noch is Hy har soan;
al liket Hy foar har ferlern,
syn wurden wiene oars, dy wiisden
op in trochgeand libben nei de dea,
dat foar har tichte eagen is noch himelsk fier
fuort, mar se heart al it Te Deum,
wylst se hoeden hâldt syn deade lea.

* Deademasker fan farao Toetanchamon
(sirka 1330 foar Kristus)

** Michelangelo (1475-1564)
Moarmeren byld ‘Pietà’