Archive for the Keunst category

Se bouden mei materiaal
dêr’t net it minste mis mei wie,
har eigen hout, mar út it wurkberie
kaam ek ’t ferfolch fan it ferhaal.

Elk kriich syn timmerark en taak
en sûnder mis waard heger boud
as dat de weagen rikten, ’t wie fertroud,
want foarop flamme harren draak.

Se sylden út ‘e haven wei
en misten mei ’t foarútsicht op
’t ferfolch gjin frou of bern of grize kop,
der ljochte op in nije dei.

It hout brocht harren nei de kust
dy’t paste by ’t ferfolchferhaal
mei hjir in gjalp en dêr in flok, de taal
fan ’t mist ús net, it is in lust.

Se setten doe de oanfal yn
mei izer foar it suverst goud,
se woene ha, it paste by it hout,
de mist loek op, ’t gie foar de wyn.

* Nikolai Roerich (1874-1947)
fûn syn ynspiraasje yn de skiednis
en yn mearkes.

Dêr sit er, dwyl en hymjend fan de striid,
de beide hannen sykje stipe,
want syn krêft streamt fuort mei ’t bloed,
wat jout dan noch syn heldemoed,
hy kin nei swurd noch libben gripe.

Hy wie noch jong doe’t ljochte op syn tiid
fan aventoer yn ’t winnend leger
dat marsjearre sûnder noed
oer moarn, de sege wie foar hjoed,
’t ferlies fan ’t libben like dreger.

De ieuwen troch hat hy as neaken byld
fertelt hoe’t leger, hieltyd leger fielt.

Mar ’t byld dat hy mei nuete guozzen dielt,
is tusken wjukken fleane, hieltyd heger.

* Epigonus (sirka 200-100 foar Kristus)
Moarmeren byld ‘Stjerrende Galliër’