Archive for the Keunst category

Doe loek de himel stadich ticht
mei molkich wyt foar ’t sinneljocht,
wat folge wiene steapelwolken,
dat de ruter hie gjin nocht
mear oan it puere fiergesicht.

De omslach kaam sa ûnferwacht
dat hy de libbensrin net seach,
mar inkeld dat hy wie allinne
mei syn hynder, dat doe fleach
foar flitsen út yn neare nacht.

De tonger kaam fan loft en grûn
troch hoeven yn wol fjirtichfâld,
syn libben draafde mei tsien oaren
oer de flakte, troch it wâld
en sa hat hy de rjochting fûn.

* Willem Roelofs
Skilderij ‘Lânskip by opkommende tonger’ (1850)

** Charles Rochussen
Skilderij ‘Ruters yn in lânskip’ (1849)

Hy is nei ’t heechste klommen
yn syn wittenskiplik ûndersyk,
waard hearsker yn syn keninkryk,
syn wrâldbyld hoecht net rommer.

Syn wrâld stiet tusken kasten,
lit er draaie as er pypskoft nimt,
gjin noed as er in berch beklimt,
dêr noeget er syn gasten.

Mar hjir stiet hy allinne
op ‘e treppen foar syn ûndersyk
en siket om syn grut gelyk,
eureka, sjoch, de sinne!

* Carl Spitzweg (1808-1885),
earelid fan de keunstakademy yn München,
skildere earst yn biedermeierstyl,
letter waard er beynfloede troch
it ympresjonisme.