Archive for the Keunst category

’t Is net it Deade See sâlt
dat him yn de poaten byt,
mar wol dat hy allinnich stiet
yn dizze godferlitten wrâld.

Hy wie fan ’t jier de bok,
tegearre mei syn maat,
wat lei oan ’t sûndich minske-aard:
de sûndebok of oars de flok.

Syn freon kaam yn it fjoer,
it offer oan Jahweh,
mar hy mocht rinne, tankebè,
syn poaten hiene rêst noch doer.

Hy krige ’t read as kroan,
it teken fan it bloed
dat floeie moast, op ’t alter hjoed
en dat fan him miskien wol moarn.

De bôge jout gjin hoop,
ferblikke troch it sâlt,
it is wol wis, hy wurdt net âld,
op nei dy kop, syn lêste loop.

’t Is net it Deade See sâlt
dat him yn de poaten byt,
mar wol dat hy allinnich giet
yn dizze godferlitten wrâld.

* William Holman Hunt (1827-1910)
makke earst religieuze skilderijen,
dêr’t er foar nei bibelske lokaasjes gie.

Hy wie in frjemde fûgel
sûnder wjuk, dus by de grûn,
yn ’t earst sa donker as in swarte krie
omdat syn biotoop net ljochter wie
oant hy de hichte fûn.

Doe krige hy syn wjukken,
noch ûnwennich fleach er op
en draaide rûntsjes boppe ’t bûgend nôt,
de roazen klapten, kleurich waard syn wrâld,
dat fierder klonk syn rop.

Syn fearren krigen tinten
sa’t gjin fûgel blonken hie,
hy flitste fan it iene nei it oar,
dêr wied er dan ek frjemde fûgel foar,
dy’t fûn waard yn de snie.

* Vincent van Gogh (1853-1890)
Skilderij ‘Selsportret’
Skilderij ‘Oan de râne fan it nôtfjild’
Skilderij ‘De iisfûgel’