Archive for the Keunst category

Hy hie genôch fan ’t kâlde Ingelân
en woe nei ’t waarme suden ta,
it Eldorado yn syn fantasije,
mei syn frou en bern koe ’t sa:
de boat op nei it fiere strân.

De earste stappen wiene net sa grut,
’t foarútsicht lake him noch ta
en ’t oseaanskip hiet de ‘Eldorado’,
mei syn frou en bern koe ’t sa:
har hân fêst en in freonlik wurd.

Mar ienkear op it kâlde achterdek
foel ’t minne waar him dochs net ta,
de krytkust like wol in Eldorado,
mei syn frou en bern koe ’t sa:
net sjen, it útsicht op it stek.

* Ford Madox Brown (1821-1893)
skildere syn masterwurk yn 1855,
doe’t de emigraasje út Ingelân
in hichtepunt berikte:
‘It lêste útsicht op Ingelân’

Dit koe Twellingea wol wêze
of oars Earnewâld of Grou,
gjin skip kin dat fertelle,
swijend sitte man en frou
en oan de iepen kroech
is ’t ek net ôf te lêzen.

’t Sigentsje lit skûten driuwe
nei de wedstriid op it wiet,
wylst ien syn priis al telle
kin: as earste oer de miet;
se ha noch foar de boech
it feest om nei te bliuwen.

’t Slepen mei de folle fetten
is gjin muoite mei it sicht
op ‘lit ús jûn net telle,
folle net genôch, ús plicht
is spiel mar troch wat droech
wurdt, dan de geit fersette’.

* Eise Aetes Ruytenbach (1656-1692)
wie glêsskilder yn Snits.