Archive for the Keunst category

Mei de hannen op ‘e rûge grûn,
de fuotten noch yn ’t paradys
stiet Eva foar de gouden apel
mei ’t gefoel ‘it is in griis
om ’t sa te litten, dan bist stapel’.

Foar de helte is se fan de wrâld
mei ’t reade huodsje en it snoer,
wat bringt har dan noch fan de wize?
Har gefoel seit ‘jou dy oer
oan goud, do hoechst net iens te kiezen’.

Op dy wize gong it troch de tiid
fan frou nei man, fan heit op soan
oant Faust ferlate Margareta
mei ’t gefoel ‘nim it mar oan,
’t is justjes oars as doe mei Eva’.

Mei de holle leit se op it Wurd,
want trije neisten binne dea
troch ’t glânzjen fan de gouden apel,
har gefoel seit ‘no myn bea
om skuldferjouwing, oars wurd ‘k stapel’.

* Gustave De Smet (1877-1943)
gie fan de luministyske styl
oer yn it ekspresjonisme.

** Nicaise De Keyser (1813-1887)
wie ien fan de belangrykste
romantyske skilders fan België.

It hat fan âlde tiden ôf sa west:
wêr’t hege macht de oerhân krijt,
befêstige troch ’t goadedom,
dêr  is ’t de leagen dy’t wat seit,
it folk dat swijt en hâldt him stom
en ’t wapen docht de rest.

Ur-Nammu sit al op ‘e keningstroan
mei yn de hân de macht oer Oer,
in stêd op ’t âlde klaaitablet,
de siggoerat as Babelsk toer,
it keningswurd as heechste wet
en ’t folk dat heart it oan.

Ur-Nammu sprekt de goadewierheid út
en ’t folk giet op ‘e wapentoer
mei ’t ivich swijen ta beslút.

* Ynvestituer fan de Soemeryske kening Ur-Nammu
Standert fan Oer – oarlochspaniel