Archive for the Keunst category

’t Swart-wite hat har yn besnijing,
faakris swalket sy fan hjir nei dêr,
is soms de sinne, dan wer stjer,
sa siket sy om har befrijing.

De jûntiid skynt foar har it gânse
libben, sakjend yn de djipte wei,
gjin langstme nei in nije dei
of dochs fanwege ljochte kânsen.

Want by har delgean lit se klimme
har gefoelens foar de heechste stjer,
de ein fan ’t swalkjend hin en wer,
tenei sil sy it derfan nimme.

Sy naam it stel mei út ‘e sinne
wei en brocht de geiten yn it skaad,
it swalkjen leit har yn it aard,
se is yn ’t fjild gjin tel allinne.

* Jozef Israëls (1824-1911)
rekke ûnder ynfloed fan de Dútske Romantyk
en wie letter de nestor fan de Haachske Skoalle.
Skilderij ‘Mimerje’

* Gerard Bilders (1838-1865)
lit yn syn wurk de oergong sjen
fan de Romantyk nei it Realisme.
Skilderij ‘De geitehoedster’

It wie in drokte fan belang
yn London-Hampstead, want de strjitte
krige yn de grûn rioel
foar lju fan stân en rang,
sa liet de boargemaster witte.

De wurkers wennen yn in wyk
dêr’t alle smoargens kaam op strjitte,
dat it waard in modderboel,
’t ferskil fan earm en ryk,
de boargemaster woe ’t sa litte.

Hy siet op ’t hynder, seach it oan:
‘Ik bin kontint mei hoe’t se switte,
’t rint wol fuort, dit wurket skoan.’

De filosoof mei brune hoed:
‘Foarearst kin ik der net mei sitte,
smoargens streamt mei yn ús bloed.’

De blommefrou yn skurve klean:
‘Ik snap it net, elk moat wol skite,
wat deryn komt, lit it gean.’

It jonkje hat in eigen plan:
‘Lit harren mar mei modder smite,
‘k meitsje der in bulte fan.’

* Ford Madox Brown (1821-1893)
begûn mei it skilderij ‘Arbeid’ yn 1852
en makke it net earder ôf
foar’t er in keaper hie (1865).