Archive for the Keunst category

Se moasten út ‘e modder komme,
opdold foar har lêste nacht
foar ’t wrede spultsje oan de trie…
wat koe it dy twa gravers bomme!

Se moasten earst de wjirmen riuwe
lykas kralen oan it snoer,
de liven krommen sûnder macht
en soene net itselde bliuwe.

Se dreauwen oer it glêde wetter
tusken moles nei it reid…
dêr sitte se mei stôk en poer
of komt de iel in oere letter?

Se komme yn it wiet telâne,
tweintich wjirmen oan in trie,
’t giet op en del, gjin fanger kleit,
de iel byt ta, glydt oer de râne.

Se treffe it mei al dy fette,
kronkeljend yn eigen slym,
’t wurdt ljocht, se binne út ‘e rie,
de iel ha alle wjirms ferfretten.

* Johannes Franciscus Hoppenbrouwers (1819-1866)
skildere meastal romantyske lânskippen.
Skilderij ‘Fiskers op in polderfeart by jûn’

’t Moat kinne, ’t kreaze neaken,
teminsten as it Venus is,
goadinne fan de leafde,
goaden binne hjirfan wis:
foar ús is sy it beaken.

Sy hâlde op dat beaken
oan, want it skeelt har net in moer,
omdat it giet om leafde:
nee, ús Venus is gjin hoer,
wy sakje wei yn ’t weake.

Mar ’t beaken is feroare
as ’t bleate fan Olympia
mei orchidee en slipper
fize skôgers glimket ta:
soks kin ús net bekoare.

Ek noch in negerinne
mei blommen, no is ’t harren oer,
in wite en in swarte,
beide spylje grif foar hoer:
wêr geane wy sa hinne?

* Titiaan (sirka 1485-1576)
stie bekend as master-skilder,
de earste Fenetiaanske skilder
fan wrâldformaat.
Skilderij ‘Venus fan Urbino’

** Edouard Manet (1832-1883)
waard om syn neakenportretten
beskôge as de beruchtste keunstner
fan Frankryk.
Skilderij ‘Olympia’