Archive for the Keunst category

Wat libbet yn in bern
wannear’t de wrâld him lûkt?
It komt oerein om fier ts sjen
en harket, fielt en rûkt.

Sy hat dy tiid al hân,
is ier al op ‘en paad
mei heit syn geiten oer it lân
en siket middeis skaad.

Al oeren sit se stil
lykas de keppel leit,
’t ûntbrekt har oan in eigen wil,
omdat de heit it seit.

Mar yn de tiid werom
lûkt hiel it spul noch oan:
‘Sjoch om dy hinne, maat, en kom,
gean op yn ús fertoan.’

De kym is withoefier,
mar by har stean de hut
fan eigen fantasy en ’t dier
al ree fan kop oant sturt.

De ezels wurde wyld
as hynders yn galop
mei beide jonges ’t bernebyld,
folslein fan sturt oant kop.

* Gerard Bilders (1838-1865)
lit as skilder de oergong sjen
fan romantyk nei realisme.
Skilderij ‘Geitehoedster’

Dit is de grutskens fan de heit
as ’t jonkje earste stappen set,
noch wif, mar feilich yn syn hannen,
wat oer ’t wêzen fan de mannen seit:
har libben rint nei grutte plannen.

Gjin grutter eangst as foar de feart
dy’t oan it jonge libben lûkt
om nocht en wille yn te drinken,
mar as mem of heit de stap net keart,
dan sil syn lûd net langer klinke.

Gjin grutter freugde as de heit
draacht yn de earms it bleate bern
en mem hat field dat er noch libbet,
wat oer ’t wêzen fan de leafde seit
dat dy it lok fan ’t bern neistribbet.

* Honoré Daumier (1808-1879)
tekene 4000 satiryske printen
en makke ek oansprekkende skilderijen.
Skilderij ‘De rêding’