Archive for the Keunst category

De sakristy is ryk fersierd
mei allerhande ornaminten
boppe boek en skilderij
lykas de tsjerke biedt
oan ’t godsfolk, hjoed mei rinte.

De riken hawwe rynsk al jûn,
de tsjerke troch de ieuwen droegen,
dat de rinte komt werom
foar twa foargoed ferbûn,
de hân wurdt set troch tsjûgen.

Elk is werkenber oan de dracht,
de âlders, dames, bollefjochter,
de marine-offisier,
in sakristy fol pracht
en priel… wêr is de dochter?

In hantaast noch yn ’t hege hier,
sjedêr de jonge boarne fan it libben,
hjoed it feest en oer in jier…

* Mariano Fortuny y Carbó (1838-1874)
wie ien fan de belangrykste
Katalaanske skilders fan de 19^e ieu.

** Berthe Morisot** (1841-1895)
moast har as froulike skilder bewize
foar har rike famylje oer.

Dêr stiet er dan, de nije kening
Leopold de Earste
yn it unifoarm fan generaal,
noch net yn hear en fear;
syn steat sprekt no in eigen taal,
en is mei Nederlân wol klear.

Neat hat er mei de âlde kening
Willem Baas de Earste,
sprekker fan de macht yn ’t generaal,
dy gie oer trije lantsjes gear,
want Benelúks wie syn ferhaal,
dêr’t hy fan tocht, it komt wol klear.

Dêr stiet er wer, de nije kening
Leopold de Earste
yn it unifoarm fan generaal,
no wol yn hear en fear,
die foar syn lân in hiele haal,
wat siert him foar de twadde kear.

* Liévin De Winne (1821-1880)
waard portretskilder fan it hôf
en de aristokrasy yn België.

** Ary Scheffer (1795-1858)
wie ien fan de bekendste
romantyske skilders fan syn tiid.