Archive for the Keunst category

Dan klinkt de seage, sjoch de beam
falt foar de opbou fan de naasje:
yn feriene steat de griene dream,
wurk foar ferdivedaasje.

Sy hawwe leard foar ’t boartersskoft
en stekke út de beide hannen,
drave, hâlde fêst, yn sleep en kloft,
no jonges, letter mannen.

Al pubers, mei de sloep fan heit,
oan board de wylgetienen fûken,
stilte dy’t in goede fangst foarseit,
earst fiere, letter lûke.

Feriene krêft yn dizze steat
sil pubers grif folwoeksen meitsje,
lykwols as de man it spul ferleart,
sil hy út lykwicht reitsje.

* Winslow Homer (1836-1910),
in Amerikaanske keunstner,
skildere bern as symboal
fan de earste perioade
fan de Feriene Steaten.

Sy hinget dreamend út it finster
nei’t se sjoen hat it ferhaal
dat Rembrandt oanbrocht op it doek,
it wie it libben bleat op goadeskaal:
geweld en leafde as gebrûk,
oerstriele mei Zeus’ glinster.

Danaë, kening Argos’ dochter,
krige libbenslang, want swier
mocht sy net wurde fan in soan
dy’t deadzje soe syn pake yn it jier
dat hy geskikt waard foar de troan,
dat machtleas wie de rjochter.

Doe kaam god Zeus mei oare strielen
as syn glinster, swaaiend as
de blossem fan de gouden rein,
syn rûge krêften brieken daliks los,
de faam is doe mei swierte slein
en mocht nij libben fiele.

En Saskia dreamt oer it dielen
fan dit libben sûnder ein.

* Rembrandt (1606-1669)
Tekening ‘Saskia yn it finster’
Skilderij ‘Danaë’