Archive for the Keunst category

Komt it libben út de Hear syn hân,
dan makket Hy in grut ferskil,
de iene kreas, fan hege stân,
de oare kleurich, wyld fan wil.

Sofonisba wiist op wiishheid, net
allinnich ûnder oaren, mar
ek boppeminsklik, nei de wet
fan tsien, ornearre krekt foar har.

Wyt de brede kraach fan suverheid,
it swarte kleed stiet foar de earnst,
mei beide is se himelsk klaaid,
de Hear syn krús draacht se út wenst.

Diabolus lit syn tosken sjen
en libbet nei de wet fan tel
oant seis, dan bist foargoed ferlern,
ik sljochtsje ’t paad wol nei de hel.

* Sofonisba Anguissola (1532-1625)
wie skilderes oan it keninklike hôf
yn Spanje.
Skilderij ‘Selsportret’

** Karel Appel (1921-…)
hearde ta de Cobrabeweging,
dy’t oprjochte waard yn 1948.
Skilderij ‘Fantoom mei masker’

De tsjerkeklokken hawwe let
en roppen ’t folk fan hein en fier
om God de Hear te smeken
foar it deistich brea en bier,
mar wa’t net rap rint, komt te let.

Bliuwt ien sitten op syn gat,
him giet foarby de Heare God.

De boarger komt ek foar de stêd,
want sûnder hannel kin it net,
dat God de Hear moat skinke,
elke stedsjer wol wol sêd,
mar wa’t net rap rint, komt te let.

Bliuwt ien sitten op syn gat,
him giet foarby de Heare God.

Sy meitsje by de doar muzyk
mei slaande tromme en de fluit
om oars net as wat sinten,
mar se krije noch gjin duit,
want wa’t net rint, wurdt ek net ryk.

Sit elk daliks op syn gat,
dan giet foarby de Heare God.

* Charles Degroux (1825-1870)
wie in realistyske skilder,
dy’t him letter talei op histoarjestikken.
Skilderij ‘Beafeart nei Diegem’