Archive for the Keunst category

Men sei ’t koe sprekken lije,
mei dy fjouwer like ’t ideaal:
acht fuotten op ‘e flier
en hân yn hân yn ’t iepenbier,
dat al mei al in goed ferhaal.

Doe kaam de tiid fan lijen,
mei de krisis spatte ’t út elkoar:
twa fuotten derby wei,
’t waard foar elkien in ommeswaai,
se rekken út it rjochte spoar.

Se stiene wer yn ’t neaken,
diskear mei in oar, in rotgefoel:
de hannen yn it hier,
de skuor kaam yn it iepenbier,
de smoargens streamde yn ’t rioel.

* Ray Charles
Keunstwurk mei ferskillende materialen
‘Famylje Românse’ (1993)

** Georg Baselitz
Keunstwurk mei ferskillende techniken
‘De grutte nacht yn de goate’ (1963)

Skerp wol er ha syn pinne,
want dat skerpet ek syn taal
foar hjoed noch yn in glêd ferhaal,
sa’t hy dat kin, allinne.

Skerp sjocht er yn de spegel
syn gesicht, hy wit, it kin
wêr’t hy fan dreamde al as bern:
syn rom riist hieltyd heger.

Syn keamer hat gjin muorren
mear, hy skriuwt de wrâld te ryk,
is oan in goadesoan gelyk
en blaast heech fan de tuorren.

Syn wurkplak leit yn ’t finster,
foar de boargers goed te sjen,
sadat de hiele stêd him ken
as ’t baaske fan de glinster.

Glêd wol er ha it skuonlear
as in spegel foar de broek,
de boarstel earst en dan de doek,
sels is er gjin mynhear.

* Jan Ekels II (1759-1793)
wie in learling fan syn heit.
Syn skilderijen fertelle faak
in ferhaal.

** Johannes Hari I (1772-1849)
wurke û.o. as hôfskilder.